2007,CCFC feedback

Canada Chin,

2007, CCFC Conference cu a dih cang i "zeitindah kan tuah, kan chambau maw, kan inuam maw, kan hlawh a tling maw?" tbk lawng zoh khawh ding in a um cang. Cucaah 2007, CCFC kan tuahnak he pehtlai in feedback tlawmpal tein ttial ka duh.

Feedback ka vun ttial tikah a tthatnak aa tel bantuk in kan tlam a tling lonak zong aa tel ve lai caah soisel ah ruah hin loin next year caah experience tha asi khawhnak ding ilak zia kan thiam khawhnak ding caah kan sawm duh hna.

A tlam a tlingnak;

1. 2007, CCFC conference kan tuahnak ah Vancouver Laimi vialte nih nan kan zohkhen ning le CCFC conference caah a herh ning in nan tawl-relnak ah a tlam a tling i kan thantthat tuk hrin hran ko hna. Khualtlung, mileng nan kan dawt ning le nan kan zoh khen ning hrim hrim ka zoh tikah vulawicung ahhin Laimi kan si hi ka uang tuk. 2007, CCFC conference ah nan dih mi Phaisa, thazaang, ngeichia vialte cu a let in Pathian nih in cham ko hna seh!

2. Vancouver mino an cawlcangh ning ka zoh tikah ka lung a tling khun ko. Nungak no tete zong riantuan le a herh mi ah an fel ning le upa deuh an ttih zah ning, nan nun a thiang ning te pawl ka hmuh tikah kan uang pi hrin hran ko hna. Pathian nih an zohkhen hna lai i Laimi caah zohchunh awktlak nusal/pasal tha a chuak ding mi lawng te nan si hna.

3. Indigenous minung, Canada Native, Australia native, Laimi tbk hi zuu (Alchohol) a duh tak tak mi kan si hna. Vawleicung kakip kan zoh tikah Indigenous minung paoh paoh "Zuu" kan duh ning hi aa khat dih. Cucaah 2007, CCFC conference hlan ah ka phang pah mi cu "ZUU" hi asi. Asi nain 2007, CCFC Conference ahcun "Zuuri cu na kawl len hna zong ah na hmu hna lai lo" ti awk in a um. Canada Laimi, Vancouver Laimi, kan uang pi hrin hran ko hna.

4. Upa riantuantu tlangtlatu, Vancouver Khrifa upa, Mino Upa le Pu. Cung Cin le Pu Van Lal Dika cungah lawmnak chim cawk lo kan ngei. 2007, CCFC conference ah nan caan le nan thazaang, nan ngeichia tiang dih in Laimi (a bik in Mino hna caah) thazaang nan chuah nak hi Pathian nih thlachuah tampi in pe ko hna seh! Nan riantuannak le nan cawlnghnak ah nan ba i nan tha a dih ko lai. Laimi phun nan dawtnak te nih an tleih hna caah atu bantuk in tlamtling tein nan kan hruai khawhnak zong hi asi ko. Laimi nih lawmh bia chim zia kan thiam lo zongah nan tuanbia dawh cu a hmun zungzal ko cang lai.

A tlam a tling lo deuhnak;

1. Schedule nan sawi mi cungah kan re a thei ko; Saturday hi full Sport sisehlaw, zanlei voikhat pumnak le sing/song service in ipeh sehlaw a tha tuk hgna. Sunday hi zing in lecture le bible cawnpiaknak um sehlaw, chun 2:00 p.m in Sunday Worship Service ngeih. A dih in zanlei pum hlan vialte chorus hla sak le social or lecture hna a um rih ahcun lecture ngei than in zanlei 6:00 pm in zan pumh awk than, tbk hi sisehlaw kan tha a dam deuh ngai hnga. Next year caah ruah te ding.

2. Pumnak ( Church or Hall) hi a nainak bik ah hlan in Sport caah field zong a nainak bik ah hlan khawh ahcun caan tampi kan save lai. Kan tha a dam fawn lai. Pumnak Hall le Sport caah field hlannak vialte cu CCFC conference a Host tu khua nih tuanvo la peng hna sehlaw tlam a tling khun lai.

3. Meeting hi biapi ngai asi caah palai meeting a kai ding le Khrifa upa meeting ah a tel ding paoh cu advance nikhat in phan in Friday ah meeting rak ngei chung cang ding asi. Meeting resolution te lawng kha Sunday zan pumh, final zan ah mipi sin ah thanh ding asi hnga.

4. 2007, CCFC Sunday meeting kha asi te asi lo; 2006 Ottawa, a voikhatnak CCFC bantuk khan Worship Service dih bak cun palai lawng si loin Khrifa upa, or khua chung upa zong meeting kai a huam mi paoh khawh in room dang te ah meeting ngei ding asi ko hnga, cucu general meeting asi colh hnga.

Asi nain 2007, CCFC conference cu pumsan aa thleng i General Meeting ngei hlan ah palai meeting tuah asi. Palai asi lo mi Pu Mang Bik nih Palai Meeting cu a hruai hna i palai asi lo mi Vancouver Khrifa upa zong an itel fawn. Cucaah zapi lungtling ding cu asi hrim lo. General assembly cu pumhnak thawngthanh in palai le Vancouver CBC upa biachah cu thanh asi i general assembly asi ti lo. Cucaah hibantuk hi a biapi ngaimi le zapi lungrual lonak a chuahter khotu asi caah iralring khawh ahcun thil tha tuk asi.

5. Online in meeting tuah hi thil awl asi lo; issue pakhat a chuak mi ah reply tuah lo ahcun issue a thi lengmang ttheu. Cucaah zapi lungtling tein decision chiah khawh hi thil har ngai cu asi ko lai. Cucaah meeting hruaitu nih deadline chiah in "Yes or No" a chuak kho ding mi topic or issue hi siam thiam a herh ngai. Cun rule tha tein tuah in deadline zong chiah in deadline hlan ah a chuah mi Yes or No answer ning in decision chiah ahcun zapi lung tling asi peng ko hnga.

6. CCFC caah Khrifa bu cio in palai thlah cio asi tikah CCFC palai nih an ceih mi cu Khrifa bu cio nih zulh dih ding asi. Khrifabu pakhat nih CCFC decision a al ahcun a palai thlah mi zei a rel lo ah ruah khawh asi. CCFC decision cu palai meeting lawng nih a chah khawh. Sihmanhsehlaw, iton a har tuk, online in meeting tuah a har ko ti asi caah khua nai deuh le a tlawng kho mi nih meeting an ngei i decision an chiah ahcun cu decision cu CCFC decision asi lo. Asi nain CCFC decision ah canter duh ahcun online in palai sinah theihter hmasa than in palai tam deuh nih an pawm ahcun CCFC decision ah pawm tbk hi thil a kal ning a dik mi cu asi i zapi zong an lung a tling lai.

2007, CCFC conference le CCFC he pehtlai in feedback ka vun ttial duh mi cu hi hna hi an si; ninghngal, fimter ah a ruat mii zong nan um kho men. Sihamnhsehlaw , keimah mimal in ka hmuh mi le thil tha asi lai tiah ka ruah ve mi kha ka vun langter ve. Cun, CCFC a that deuhnak ding, kan lung aa rual deuhnak ding, le kan kar lak ah itheihthiam lonak a tlawm deuhnak hnga ding caah santlai asi hnga maw tiah ka ruah caah asi bik.

Lawmhnak tampi he,

Zasang Cinzah

Ottawa