2007, CCFC in Vancity!

2010 ah winter Olympic an tuahnak ding, vawleicung ah khua dawh bik tiah an thimmi, zion thlang bantuk tlang nih a kulh i an khua chung ah Sea buss kalnak zong a um mi Vancity, Vancouver ah Chin Christian Fellowship of Canada Conference” cu June 29 in July 2 chung tuah asi i Pathian lam hruainak thawng in zeihmanh hnahnawhnak um loin dih asi cang. Khua kip ah a ummi mino hna an ihmu, an iton hna i an inawmh ning hna ka hmuh tikah ka lawmhnak mitthli a hai. Hi tluk a sunglawi in a miak a ummi CCFC conference ahhin Ottawa mino zong kan rak kal lo dengmang, sungh zatlak in pei kan sungh deng ko hi ti hna ka ruat. Mikhual kan za tein minung 57 kan si.

Vancouver cu tlang nih a kulh tikah minmei nih a zel peng, cun rili pawng ah a ummi khua asi fawn tikah khua caan a hman lo i, rua a tamnak hmun asi fawn. June 27, 28 hrawng ah Canada Day long weekend cu rua a sur ding in Weather Network nih a chim. Hmm...rua a sur ahcun kan conference cu a nuam lai lo hi te aw tiah ka thin ka dawm. Sihmanhsehlaw kan conference chungah ruasur lo tein a um. Pathian cu a tha i a dawtnak hi a lian hrinhran ko. Hmasa bik zan June 29, ah Vancouver, CBC Pastor Ceu Hnin nih a chimmi cu; “Zeizong vialte hi Pathian thawng lawng te an si dih! i phawrhlaw hlah usih! Kan i phawrhlaw ahcun kan mahnak in aa phawrhlaw kho mi an tam tuk, CCFC a tlam a tlingtertu cu Pathian asi” ati. A dik tuk, nikhua a thattertu cu Pathian asi ko.

Pathian bia hi a tling chin lengmang bantuk in vawleicung minung hi materialism (chawva, chawhlawn duhnak) nih minung hi a kan uk chin lengmang. Chawva duhnak nih a ukmi hna minung cu an hawi, an kawm cungah an polite kho lo, social lei ah an chambau chin lengmang i duhfahnak le mah zawnlawng ruatnak nih a tei chin lengmang hna. Laimi tampi zong chawva duhnak nih a kan tei i social lei ah kan chambau chin lengmang ve. Sihmanhsehlaw, Vancouver laimi nu le pa nih khual tlung, mileng an kan zohkhenh ning, an kan dawt ning, anmah nak in mileng an kan dawt deuh ning hna ka hmuh tikah ka lawm tuk i Laimi kan si hi ka uang tuk hrin hran.

Pastor Tim Nelson nih a kan cawnpiakmi vun tenh ta ning; Pastor Tim nih “Laimi nan nunphung, upa deuh nan upat ning le pakhat le pakhat kar ah dawtnak nan ngei ning, nan lung athian ning le nan I komh ning hna hi ka hmuh tikah a tha tuk hrin hran, hi tluk aa dawhmi nunphung hi cu kal tak hrim hlah u” a kan ti. Pastor Tim nih 2006 siseh, 2007 CCFC in Vancity zongah a kan cawnpiak bikmi cu kan nunphung kan thlau lo nak ding le kan biaknak ah fek tein kan dir i kan fanau hna zong nih an hung kan zung peng ding hi a si. Holh lehtu hi tlangval Za Ceu Lian asi.

Saturday chung ah lecture an kan pekmi ah pakhat cu; Steamroll hi a tahchunh. “America cultural hi nang caah steamroller bantuk in ttih a nung mi asi” ati. “Lungrialnak nih a bingbo mi vialte hna rawn lak in a rial bantuk in nan nan nunphung hi America nunphung nih a von rial te lai i nan nunphung hi a tlau a awl tuk cang, cucaah hihi zeitindah kan doh lai ti hi a tu tein tan lak cia a hau’ ati. North America hi taksa leicun kan paw a khim mi an si nain thlarau lei in a paw a tampi, muinak chung ah a ummi an si, cucaah America nunphung nih a von in kan den tik ah kan nunphung a tlau pin ah kan zumhnak tiang a hrawh khawhmi ding hi ralrin ah a kan cawnpiak mi asi.

A zan ah sermon a kan chim nolh mi cu John 17 hi asi; Point pathum a lak: Worship, Unity le Mission ti in a lak. Pathian nih a kan ser chan cu a mah biak le thangthat awk ah asi. Pahnihnak; Minung zoh loin Pathian kan zoh viar ahcun lungrualnak a chuak, zeicatiah, Pathian ah pumkhat kan si. Pathian nih a zumtu hna a kan duhsakmi cu mission rian tuan hi asi; ti han hi a kan cawnpiak. Khuazakip ah va kal ulaw ka thawngtha hi va chim u tiah Jesuh nih a kan ti.

Cucaah Pastor Tim nih a kan cawnpiak bantuk in Vancouver Laimi cu ka thangthat hrin hran ko hna. Laimi nih kan ngeimi nunzia dawh cu an sinah a leng rih ko, hmai lei zong, a leng peng ko lai ka zumh fawn. Oop! Kan caan hman ning le kan inuam ning hna von chim ka philh deng cu; Sport lei von chawi usih!

Saturday After noon
Saturday cu chun Pastor Tim lecture a kan pek khawh in 2:00 PM ah Soccer field ah kan chawi viar hna. 1st ah volleyball Calgary le Vancouver B team an beng colh, Calgary cu an sungh ai. Second ah Vancouver A le Ottawa, Kitchener an benh i Ottawa le Kitchener nih an thah deng fawn hna. Final cu Vancouver B team le Ottawa le Kitchener kai ding asi i Sunday caah chiah asi. Vancouver cu Nungak tam tuk hna kaw team hnih in an chuak. Calgary le Ottawa nungak cu an ifit ning hi chihzawh cu lo hna kaw, Vancouver nungak rual u Tha Tha, Nungak tbk team pawl cu an thah deng ve hna. Final cu Vancouver nungak tleirawl team le Calgary le Ottawa cu Sunday ah kai ding in an chiah ve. Vancouver Nu volleyball team..

Soccer cu lottery in zuh asi i Calgary le Vancouver A team cu an chuih colh. Calgary hi Vancouver nih an rak zenh ngai ngai mi hna an si. Vancouver nih Calgrary an zenh nak hna a chan cu Calgary khuabawi Levipa, a min din cun “Tawk a” a thei bal lo mi nih cun tawka ti zong a fawi te; Tawk a nih Calgray pawl cu an thiam tuk tiah Vancouver ah von report rua kaw, cucaah Vancouver pawl an lau nawn rua. Sihamnhsehlaw, Calgary kha zei hmanh an si lo, an thli te lawng a si i Ottawa kha daiziar a um tung i a mak bak mi an si.Lolz.


Vancouver nih cun A le B tiin an ithen i A hi mi nih an tei awk, B team hi 1st hmuhnak ding tiah an rak iruah. A team pawl cu an lung a rak fak ve ziar ai..Lolz. Thiam lo team tiah an chiah mi pawl A team cu a thahri a ttha mi deuh lawng te cu rak si hna kaw, Calgary nih an tei kho ti hna lo. Calgary cu an sung colh.

Ottawa le Kitchener fonh le Vancouver B team cu an von itawng cu; Vancouver B Team nih an tei kho set ti hna lo. Ottawa, Kitchener cu an ruah leng in an rak mak. Ottawa minta zong cu a chuih ve len nain fellowship asi caah mingal chuih a ttih deuh i a veng deuh. Calgary khuabawi cu “lawmnak thlam ka lung chung ah a um’ ti kha a rak sak len ve rua. Thiam lo 1st ah a rak thim sehlaw a dawh. A donghnak ah Ottawa, Kitchener cu an sungh ve Vancouver A le B cu Sunday ah final kai ding an si.

Ottawa Pu. Amos Kung nih cun, “Vancouver A le B cu khua khat an si ko i hmai zarh ah final cu rak kai ko hna seh, caan ngei lo he” ati. Vancouver pawl nih a thiam bak lomi tei awk team ah an chiah mi hna A team hmanh nan tei hna lo ahcun lak awk bak nan um lo e’ ti asi ve. Cu ticun Saturday Sport cu nuam tak tak in kan dither. Canada Chin Idol ti tluk asi, hla zuamnak ah chawi usih!

Saturday Night

Saturday zan cu phung chim dih bak in hlasak zuamnak a um lai ti sikaw, zan pumh ko cu ka ngeih hoi; inn ah kan tin cio hna i a ran khawh chung-ran in kan i khawlh hna. Khawlh dih cun mah le centre cio ah Choir siseh, solo siseh, duet siseh, an practice cio hna. Calgary le Vancouver nih Ottawa CBC Choir kan practice thawng cu thei hna khaw, an thin a phan tuk cang. Zanlei suimilam 6:00 ah kan ipumhnak Grandville Chapel hall cu kan phan dih hna i zanriah kan ei colh! Zanriah ei dinh cun minute 10 hrawng break caan kan ngei i 7:30 PM ah Saturday zan pumh cu awt asi. Vancouver Choir nih hla an remh i tlawmpal an von i palh pah! Hla zuamnak a si rih lo caah an vantha, Oop! Zeitin hen tiah an lau nawn. A cunglei i kan tar cang bantuk khan Pastor Tim Nelson nih phung a chim; John 17 kha a rel i Worship, Unity le Mission kong hi fiang ngai in a chim. A tha tak tak.
Pumh dih bak in Vancouver Choir cu an chuak dih i hla izuam tikah palh lo ding bak in an i chim ta hna. Calgary Choir cu an chuak i ti-sa an din ve. Vancouver Choir uniform cu a rang i a hngawng a sen, Catholic Uniform sisehlaw a dawh. Calgary Choir Uniform cu a nak i a hngawng a rang. Ottawa Choir Uniform cu blue color asi i a hngawng a rang mi in a tial ve. Ottawa Choir uniform hi dawh bik sehlaw a dawh!

Hlasak Zuamnak

Canada Chin mino hna cu an mui a dawh, an titsa a tha fawn tikah zoh cim lo hi an si ko hna. Hlasak zuamnak ah an von rock!! ding ko hi ngeih aum. Hlasak zuamnak cu von thawk colh asi i Vancouver mino upa Pu. Sang Cem le Nungak Biak Tial nih an kan hruai i solo, pakhat hlasak in an von thawk colh.


Minung 8 nih an sak i an thiam dih hna. Pastor Tim hna nih cun Canadian Idol ah a zuam kho ding lawng te an si a ti hna. A thiam dih mi hna lak ah a thiam bikmi thim hna hi a awl lai lo, sihmanhsehlaw, a thimtu judges nih an zoh hna i nungak Mai Ni Len Thai cu 1st ah an thim. A thiam tak tak kha asi ko. “A nu Pi. Ngun Bu hrim pei a nungak lio ah hlasak minthan asi cu” tiah chim pit ah an ti. Second ah Vancouver CBC Pastor Cung Bawi Thawng Nupi Pi. Ngun Thluai Ci an thim. Hla a von sak tak tak cu nungak ah ruah sual in a zuun in awi a fawi tuk ve fawn. Single picture hi Ni Len Thai; a aw a tha tak tka mi cu asi.

Duet ah pakhatnak a hmu tu cu; Mai Ni Len Thai le Tv. Cung lian Uk an si. Second ah Ni Len Thai le a nau Mai Mang Tha Hluan an si.

Trio ah 1st ahmutu cu Za Hlei Thang, Genevi le Van Rem Hniang an si. Second ah Winnipeg in Ram Uk Lian, Robert Thang le Hram Tin Thluai an si ve. Van Rem Hniang cu tlangval pahnih kar i a dir mi nu te hi asi.

Pali hlasak ah a zuammi hi pakhat lawng an si i an mah nih 1st an hmu beh, cu hna cu That Ci Lian, Ngun Thluai Ci, Phun Kam le Mai Ni Len Thai an si.

Choir zuamnak hi hmasa bik ding asi nain mipi an mitku lei sang ah lau lengmang in von chiah hna usih an ti caah a donghnak an an chiah rua. Hnu bik ah sak asi.

Ottawa CBC Choir nih 1st ah an sak; Hla pi asi bantuk in timing a thleng mi asi tikah niam deuh in an lak sual, cu hmanh ahcun vanmi khi rungtum hna sehlaw cucu nan lo tiah mipi nih cun an ti; an thiam bak 1st an hmuh colh.

Calgary choir nih an von remh ve; An khuabawi Levipa nih a remh pi hna. Mizo hla cu aw pei nawn in, thang tak tak, i biatak ngai in asak fawn tikah mipi cu an ni pah! Second tal cu hmuh awk an i tlak nain Vancouver nih an tei hna i pathumnak an hmuh.

Vancouver cu an thiam ngai ngai ve, asi nain zuamnak lawng ah an thiam tikah pakhatnak hmuh awk ahcun an i thlak deuh rua hna lo, Ottawa nih an tei hna. Ottawa cu Choir zuamnak hla kha sak than an duh tuk nain caan an tin ti lo, hla dang zong tam ngai an iphurh ko nain saknak caan an ngei lo caah Ottawa ah an kirpi dih than.

Sunday Morning

Sunday Morning cu suimilam 8:30 am in Buss nih Bethany Church ah a kan kalpi i cu ahcun volleyball final le bawlung final cu Bethany Church pawng soccer field ah kan zoh hna. Ottawa, Calgary nungak le Vancouver nungak cu an benh hmasa. An thiam ve ve hna. Zoh an dawh ning hi khua ruah har an si. Za ceu Lian nih referee a tleih piak hna. Lenglei in an au hnawh hna. Bawlung vawlei a tlak caan hi an idin caan lawng asi ti awk tluk in a um. Pu. Cung Cin hna a nawmh tuknak ah volleyball an benhnak hi voinga hrawng a hel manh, aa theih lo. Nain ruah lo tuk in Vancouver Nungak team nih an tei hna. vancouver tleirawl team cu 1st an hmuh. Asi nain Nu volleyball ah Ottawa nungak Grace Biak Chin Sung an pek. A thiam bak ve fawn.

Ottawa, Kitchener le Vancouver B team cu an bengh colh ve. Final cu sikaw zoh an dawh bak. A zum tuk mi Vancouver B team cu an sungh I Ottawa le Kitchener nih 1st an hmuh. Volleyball ah the best player cu Lal Muan Kim an pek. A thiam bak ve fawn.

Bawlung cu Vancouver B le A cu final an kai; B team nih tei cia ding in an ruah hna. Tlawmpal an von chuih ah penalty in A team nih an goal colh hna ai. Oop.. tiah tlawmpal cu B team cu an lau nawn cang, nain kan cham ko hna lai tiah an hna a ngam rih. Goal thleng tiang an goal kho ti hna lo. Goal thleng hnu ah an von chuih nawlh cu A team nih an goal an goal hna i goal 4 zero lianpi he 1st hmuhnak ah an i chiahmi B team cu an sung ai.. Bawlung cu aw, a pum le ti ah donghter asi ko. The best player ah Laite thim asi. Defense a tlai i an phoh kho bak lo. Chun suimilam 12 ah sport cu dither asi i lunch cu soccer field ahcun an kan pek colh. Sunday Sport kan ngei lio i ni lin pah, soft drinks le water cu kan heu ngai ngai. Lentel kan icelh chung ah kan din mi le kan ei mi vialte cu Pu. Joseph le Oma ( or Uma) deuh dek; cu nih cun an kan hluk dih!ceilak te an dih lai! Pathian nih thlauchuah pe ko han seh! Chuncaw ei dih in cheu khat inn ah an tin i cheu khat cu Sunday Worship Service ah an langh.

Sunday Worship Service
Chun suimilam 2:30 in Sunday Worship Service cu thawk colh asi. Ottawa CBC Choir nih hla an remh i Ottawa in kan pa bik Pu. Sui Ceu nih phung a chim. Sunday Worship Service a dih bak in CCFC palai pawl meeting an tuah. Cu chung ahcun Ottawa CBCY nih 2007 lucky tickets an tuah mi awnnak asi. Prizes cu; Computer Laptop, Digital Camera, MP3 le Sport Bag asi.
4th prize cu Toronto in Pu. Ceu Thawng nih a poh i, 3rd prize cu Ottawa in Pi. Lily Par nih a poh ve. Second prizes cu Calgary in Pu. Khuma nih a poh i 1st prize computer laptop cu Vancouver in Pu. Joseph Kap Hu nih a poh.

1st prize a poh tu Pu. Joseph Kap Hu nih Computer Laptop cu Ottawa mino kan hlut than hna ati caah computer laptop cu a hmun ah zuar colh asi i Canadian dollar 600 in Vancouver tlangval pakhat nih a cawk hna. Pu. Joseph Kap Hu sinah Ottawa Mino cu an ilawm tuk hrin hran. Pathian nih thluachuahnak pe ko hna seh!

Palai meeting cu a sau nawn caah cu chung vialte cu hlasaknak le nuamhnak in kan caan kan hman. Palai meeting cu a dih in mipi sinah phuannak le hnatlaknak lak asi i a dih tikah dinner cu kan ei ti hna. Dinner a dih in evening worship service cu thawk colh asi i Ottawa Mino le Winnipeg mino nih groups song an sak. A dionghnak zaan asi bantuk in a lar ngai ngai mi pu. Elvis Ceu nih caan a tlai i Vancouver CBC pastor Cung Bawi Thawng nih phung a chim. CCFC tlangtar; nangmah na dawt bantuk in na innpa va daw ve’ ti kha a chim. A thiam tak tak ve fawn, a fa tein nain…

Pumh dih in 1st prize a hmu mi pawl saklawng peknak in an hung zulh colh. Cu dih cun Vancouver CBC secretary Pu. Za Lian nih lawmnak bia a chim i, CCFC coordinator Pu. Cung Cin zong nih lawmnak bia a chim ve. Cu dih cun Pu. Than Aung thlacamnak in CCFC conference cu a dih. 2007 Vancouver, CCFC conference pi a tlam a tlingter tu cu Pathian asi i rian atuantu cu Pu. Cung Cin asi. Canada Chin miphun caah aa zuamnak le a caan a peknak hi zoh chunh awktlak hrim hrim asi i upat lo awk a tha lo. Cucaah Pu. Elvis Ceu nih "Canada Chin Man of Ther Year" ah ka thim tiah mipi sinah a phuan. Thimphu te asi. Pathian nih lam hruai chin ko seh!

Vancouver mino nih CCFC a dih lai cu kan siang hrim lo e tiah hall pakhat an hlan i cu ahcun kan kal dih hna. Zei ko hen an tuah te lai tiah "stage show" cu an kai hnik. Love song lawng te bak sak asi lai an ti fawn. Mino cu a tur ko in an tur i ,, awww hi ko hi pei CCFC cu asi hi tiah ka lungthli te cun ka ti. Vancouver mino nih fund kawlnak tiah pangpar cu gate hram ah an zuar i $ 550 nak tam kan hmuh e an ti. A nuam tak tak kha asi, tin siang ding cu asi lo, nain thaizing lei hna caan kan ngei rih caah siang lo buin zan suimilam 2:00 Pm ah an dih ter i kan tin dih hna.

Monday
Winnipeg le Calgary kal aa timh mi pawl zong an ilet dih hna i Monday cu kan zatein Vancouver ah a dawh biknak an ti mi Stanly Park ah buss pahnih in kan kal hna. Stanly Park cu rili a fonghleimi asi bantuk in a kau tak tak i a dawh tak tak fawn. Rili kam in minung kalnak, cycle kalnak, a cung bik ah mawtaw kalnak tiah an then dih hna. Kan ke in a runpi in rili kam minung kalnak cun kan kal hna i Vancouver CBC Chiarman Pu. Ngun Cung Lian nih cun "poster i tuah colh usihlaw san-dah-piah law law ding asi ko, a rem tuk hi" ati phah. Stanly Park chung ahcun ni a dainak hmun ah a kual in kan thu hna hi nawmhnak an kan tuahpi, bia chimnak hna an ngei cio i a nuam tak tak kha asi. Stanly Park ah kan caan zeimawzat kan hman hnu ah Buss in inn ah kan tin than hna Kingsway Hall ah lunch kan ei ti hna. Cucu a donghnak bik CCFC kan caan hman ning cu asi. Monday zaan cu zei program hmanh aum ti lo, nain vancouver mino upa nih Calgary nungak tlangval thlahnak cu Pu. Roger te inn ah an tuah. Pu. Roger te inn cu Ting 7 nak tam in an cawk mi asi tikah a tha ngai ngai. Nungak tlangval a runpi in kan thuti hna i Lai hla (zuun hla) cu awithliahmah in kan sak hna. Hi ko hi pei a nuam hi tiah ka lung chung te cun ka ruat. Sihamnhsehlaw, zingka tein a kal ding an si caah sau thut ngam lo in kan kut kan itleih hna i kan tin dih hna.

2007 Vancouver, CCFC conference cu a nuam tak tak kha asi ko. Kan chan chung ah tuanbia pakhat kan tial mi asi ve. Vancouver laimi mino tete an fel ning le bochan awk an tlak zia hna ka hmuh tikah lawmnak in ka khat. Mawtaw an ngei viar hna i umkalnak ah chambaunak a um hrim lo. 2007, CCFC Conference cu a dih ruang mang ko cang. CCFC conferenc ekan tuah cu Mino hna ca ko aha tha khun i anuam khun. 2008 CCFC conference ahcun mino pakhat hmanh tang loin kan kal khawhnak ding hi nu le pa nih thazaang kan pe te u! 2007, CCFC cu adih ruangmang cang, hnu khirh khawh asi ti lo. Cucaah Canada Chin nih kan duh biknak Kitchener ah 2008 ahcun i tong than dih hna usih! Kitchener Laimi vialte zong nih an kan welcome hrim hrim ko lai.