CHIN NATIONAL DAY
Ottawa, Canada
By Zasang
Chin National Day cu Ottawa khuasa Chin Miphun hna nih a ni le a caan te February 20, 2006 ah Bronson Centre Hall ah hlunghlai ngai in tuah asi. February 20 cu kan Miphun ni asi bantuk in kan riantuannak ah siseh, kan siangin kainak ah siseh February 20 cu kan miphun ni hman duh ah day off lak viar asi. Miphun ni cu aho paoh nih rak sungsak cio asi bantuk in day off hi awl tein lak khawh asi. Cucaah 2006 Miphun ni cu Monday a asi ko nain weekend bantuk in minung kan tling thiam thiam. Khat ta lei in tuak ahcun Monday asi hi i lunghmuih khun ding asi in a lang, zeicatiah, kan miphun ni cu kan boss te sinah kan va chim, day off kan lak, kan siangin kainak ah kan va chim hna, day off kan lak, hi tikah khi kan chim rel mi nih khan miphun ni spirit kan ngeizia kha an langhter. Cun miphun dang zawng nih miphun ni a respect mi kan si kha an theih i, Chimmi kan si kan izahpi lo zia zawng kha a langhter fawn. Cucaah Ottawa Chinmi hna nih kan miphun ni kan hman mi hi hawi dang an hman mi he tah chunh ahcun miphun a daw khun mi kan sinak hi a lang ngai ngai.

Kan miphun ni kan hman ning cu kum dang kan tuah tawn bantuk in section pahnih in then asi. 1st section cu hram thawk thlacamnak in thawk asi i, cun statement relnak, keynote speaker, short remark, cun Chin patriotic pawl respect peknak, vote of thank in caan cu hman asi. Chief Guest ah hin Ottawa Chinese Community Co-ordinator Esther Yeung hi kan sawm. Chin Miphun hi community fa te kan si nain a kan thangthat ngai ngai. Cun bomh kan herh asi ahcun an sinah bomh hal khawh peng an si zia zawng a kan chim i thazang tampi a kan pek. Short remark a kan chimtu hi Penny McCann asi i, a mah hi SAW Video-Youth program Director of Ottawa asi. An rian tuannak le an cawlhcanghnak tampi a kan chim i thil kan theih bal lo mi tampi a kan theihter. Cun Pu. Ca Mau nih a edit mi Slideshow presentation, Laimi kan nunphung le kan tuanbia, kan sining hna cu zoh asi.

1st section a dih hin 2nd section nih a vun zulh cawlh. Miphun ni kan hman caan paoh ahhin aho paoh nih kan i ngeih cio mi cu second section hi asi. Nungak dawh, tlangval dawh an parmuai an langhter nak section asi. Miphun ni ahcun aho paoh i ttamh dih cio asi tikah nutung hmanh hi nungak ah rel sual an fawi te. Nungak chin chin cu tlangval mit ahcun a zel in an i zel ko, zoh cim lo an si ko hna. Kan Chin lam an vun lam chin chin ahcun an i rem a zual. 1st ah Falam nungak tlangval nih “Chinland Ram Nuam” cu an vun lam. Lam an thiam lawng si loin an thil thuam le an mui dawh hrim hi zoh cim lo an si ko. Miphun dang a vun kan zawh mi hna cu, an boring te sual hnga ma cu tiah thinphan in program kan thawk hlan ahcun ka thin ka rak i dawm. Laimi le a caan ah kan chuak kho fawn tawn lo cu mu, cu tikah ka lung re a rak thei nawn. Asi nain kan Chin Nungak tlangval an vun lam ahcun an i nawmh ning le an tha nuam ning hi an mit hmai ah hmuh khawh an si. Falam nungak tlangval an vun lam dih bak in Haka nungak tlangval nih Sarlam an vun peh cawlh. Haka thuam cu a rak i dawh ve hrim ko rua, nungak tleirawl tete hna nih an vun i hruk ko ahhin a dawhnak a lang khun. Lam lo in minute 10 stage cungah dir sawh sawh usihlaw cu hman ahcun mipi nih kan zoh cim men lai lo dah ti tluk khin mipi mit hmai a lang. Haka nih Sarlam an vun lam dih in Falam nungak tlangval nih Ral-lam an vun peh cawlh thanh. Stage cung in an lam cu ka zoh hna, mipi lei ka vun i mer cu miphun dang a rak kan zawmh mi ko hna khi an mithmai ah wonderful lawng te a cuan, a kan hngar ngai mi ko khi ka lawhter hna. Pu. Ni Kio Bik hrim hi, hi bantuk cultural dance show he cun a tlak. Hi caah hin pei an nu zawng a rak ngahnak asi lai hi. Kho men ah!

Ral-lam Falam nungak tlangval nih an vun lam dih cun Haka nih Bawi Kil Lam, kan pipu hna nungak tlangval an rak i hluainak cu kan vun peh cawlh ve. Nungak-tlangval karlak thlak in kan kut kan i tleih dih hna thla khat chung kan cawnmi cu kan vun lam piak hna. Stage cungah kan lam hrimhrim hi a nuam tuk in ngol duh ding khin a um ti lo. Mipi lei ka vun zoh tawn ah hin mipi cu an lang kho ti lo, camera flash le mei ceu lawng te asi ko cang. Cu lio i ka lung ah a vun chuak mi cu Chinmi kan nun phung hi hitluk in maw a rak nawmh ti kha ka lung a ka pemter.

Cultural dances kan dih cun singer pawl nih an aw-zai in an peh thiam thiam. Caan kar lak ah Lucky ticket zuhnak hna an tuah. Chin Miphun Ni ah a lucky mi cu, mi luck an si hrim hrim ko lai. 2006 Chin National Day Spirit cu mizei thinlung paoh ah hin a cam dih cio ko. A hram thawk in a dih tiang hi Movie tha tein record an kan tuah piak. Pu. Ca Mau an siangin in Video editing a cawng lio minung 5 le an saya pakhat nih video le presentation lei cu tuanvo an lak i, Video an kan lak mi hrim lung a hmui khun, kan i dawhnak te kha an khen khun lai ti a fiang ko.

Caan nih mi cu a kan hngak lo bantuk in February 20, cu a suimilam caan in a liam chin lengmang. Chin Miphun an ni sunglawi ni cu a dih lei kan panh. Caan dih ter lai cu sian cio asi lo nain caan nih a kan pe ti lo caah rawl ei dih cun 2006 Chin National day cu dih ter asi. Kan dihnak ah Bawi Kil Lam cu a kan rak zawh mi kual le lai he kan za te kut tlai in kan lam hna. Cu ti cun kan caan cu kan dih ter.



Canada Chin
Ottawa, Canada