Canada Chin

Canadian Chin hi Canada ram ah kan umnak hi a sau rih lo. 1997 hrawng in minung tlawm te pakhat hnih Thailand in an rak lut. 1999 in India lei in panga ruk nih an vun chap hna. Cu ticun 2002 tiang kha mitlawm te nih khua an ra sa. Asi nain Chinmi cu kan ram a that lo ruangah ram kip ah idornak hal in kan vai. Cucaah atu ahcun Chinmi hi ram kip, Norway, Demark, New Zealand, Sweden, Australia, Canada le US ah khua kan sa cang hna.

Canada ram khua a sa mi Chinmi hi atu 400 reng lo kan si cang. Tam bik cu India le Malaysia in a rak ra mi kan si hna. Chin Miphun cu Krifa kan si bantuk in kan phan nak kip ah bu kan dirh i, kan mah le kan phung lam tein Pathian cu kan biak. Canada zawng ah Ottawa, Vancouver, Kitcheners, Winnipeg, Calgary le Regina ah khua an sak hna i, kan umnak khua cio ah Krifabu kan dirh. Kan mah tein pakhat le pakhat kan i zoh khen hna, kan i bomh hna. Hi hi Miphun dang nih Chin mi an kan tluk lonak pakhat asi.

Ottawa

Canada Khuapi bik Ottawa hi Chin Miphun tambik umnak asi. Biakinn Pahnih Chin Baptist Church le Ottawa Chin Believer Fellowship a um. CBC ah members 70 hrawng an um i zarhpi ni chiar choir an remh khawh, cucaah pumh khawmh hi a nuam in a nuam tak tak ko. OCBF ah members 50 hrawng an si ve i, kan ipumh hi a hlunghlai ngai tawn. Ottawa cu khualipi bik asi bantuk in minung tlawn lennak le safety lei in Canada ah a that biknak asi. Parliament le cozah offices pawl a umnak asi bantuk in living standard a sang i, thil man zawng khua dangnak cun a fak deuh. A khua hi a dawh, tlawn lennak aa rem, a safety tikah minung zapi nih Ottawa ah khua sak cu an duh cio, cu caah Ottawa ahcun rian a har. Asi nain siangin ca cawnnak lei cun Canada ah a that biknak khua asi. Government Building, Parliament Hill, Redeu Canal War Museums, Canadian museum of civilization, tulip part ti bantuk interesting thil zoh awk tampi a um. An khua cu Ottawa river nih a kulh i winter ah skate ciknak, summer ah boats ciknak, cun river side ah bicycle ciknak ah an hman. Cu ticun nuamnak phun a tling nak hmun asi caah Ottawa cu tourist tampi kir an duh ti tawn lo.

Vancouver
Vancouver ah hin Canadian Chin second largest an umnak khua asi. Vancouver cu tlang nih a kulh i, a pawng ah lake a um pah. Vuleicung khua dawh bikah an thim a voi a tam cang. 2005 zawng ah khan Vuleicung khua dawh bik tiah an thim than rih. Vancouver cu Canada west British Columbia ah aum. Climax hi a tha, Chin State bantuk asi an ti, a kik lo, a lum fawn lo, cucaah tlawn lennak ah a nuam i mirum tampi cu Vancouver ah khuasak hi an duh. Vuleicung khua dawh bik, Canada ah weather a that biknak Vancouver ah cun Canadian Chin hi over 100 hrawng khua an sa. Cu ahcun Biakinn pakhat a um, Vancouver Chin Baptist Church. Vancouver cu 2010 ah Winter Olympic a um ding asi caah construction rian tampi a um, cucaah tam deuh cu rian an tuan hna.

Regina
Regina hi Saskatchewan ah khua lian bik asi. Chinmi tam nawn te Regina ahhin an phan nain rian tuannak a har deuh caah tam u cu khua dang ah an i thial. Regina hi Queen Elizabeth te Canada an rak luh ka i an umnak hmasa bik asi caah a khua hi a tha i a thiang hlim fawn. Cun mirum deuh le cozah riantuan deuh an umnak asi caah public rian a tlawm. A khua hi hmun hma lawng tampi a um caah Chinmi zawng cu ka ahcun tam deuh an chiahnak hna hi asi. Regina ahhin Chinmi 20 hrawng an um i, an tlawm deuh caah Biakin an ngei lo. Mirang an hawi le sinah an i pumh tawn.


Winnipeg
Winnipeg hi Manitoba Province ah khua lian bik asi. Canada chak lei deuh ah aum mi asi caah Chinmi umnak khua ahcun a kikbiknak hmun asi. A pawng te ah khuafa nawn Branson a um i cu ka zawng ahcun Chinmi an um thiam. Winnipeg ahcun Chinmi a kan daw ngaitu Rev. pakhat a um cu nihcun construction rian tuan khawhnak a hal piak hna tam nawn cu rian ahcun an lut. Khuadang lei zawng an vun chah hna i family pahnih thum cu an va kal. Cucaah Canadian Chin an va karh deuh ngai.


Calgary

Calgary hi Alberta Province ah second large asi ve. Alberta cu Canada Province vialte lak ah a rum bik mi province asi bantuk in Calgary hi rian a tam ngainak hmun asi. Calgary ahhin Canadian Chin hi 30 hrawng an um. Biakin pakhat Calgary Burmese Christian Fellowship a um. Burmese cu an si lo nain biaknak leicu ruahnak kaupi ngei a tha an ti caah asi lai cu Burmese an telh. Tam deuh cu rian an tuan.

Kitcheners
Kitchener hi Ontario Province ah a um mi asi i, khua fa te asi. Asi nain khua dang Waterloo le Cambridge kar lak ah aum i, an ipeh viar cang caah khua lianpi cu a lo deng ve. An khua thum fonh hmanh in khuapi ah a um cang mi caah cun a fa deuh rih. Cu belte khuafa te asi ko nain Bawi Pawng thut le cerhkam thlawh an ti bang, Canada ah Khua lian bik Toronto pawng ah a um i cu caah rian a tam. Toronto cu business centre asi caah a pawng kam hi companies a tam. Cucaah riantuan, hlawhfa nak ahcun Kitchener cu atha ngai ngai kha asi. Cu ti rian a tam caah Canadian Chin cu tam nawn te Kitchener ah an pem cang. Hmai lei ahcun Kitchener hi Chinmi tamnak bik khua ah a cang te lai. Krifabu pakhat, Kitchener Chin Christian Fellowship aum. Hla sak thiam le music lei a thiam mi an umnak asi caah pumh khomh hi a nuam ngai ngai. Cun rian tamnak ah a um mi hrat cu motor an ngei dih hna I, Canadian chin ahcun a standard a sang bik an si, a nuam bik zawng an si hna. Nungak belte an ngei lo caah an buai nawn.